سپریم کورٹ نے حجاب کیس معاملہ کو بڑی بنچ کے حوالے کیا

نئی دہلی: سپریم کورٹ نے حجاب کے معاملے پر فیصلہ جاری کر دیا ہے۔ تعلیمی اداروں میں حجاب پہننے پر کرناٹک حکومت کی پابندی کو چیلنج کرنے والی کئی عرضیوں پر فیصلے میں اتفاق رائے کا فقدان تھا۔ سپریم کورٹ کے دو ججوں نے مختلف فیصلے سنائے۔ جسٹس ہیمنت گپتا اور جسٹس سودانشو دھولیا پر مشتمل بنچ جس نے اس کیس میں دلائل کی سماعت کی اور 22 ستمبر کو فیصلہ محفوظ کر لیا۔جسٹس ہیمنت گپتا نے کرناٹک حکومت کے احکامات کو برقرار رکھتے ہوئے کرناٹک ہائی کورٹ کے جاری کردہ فیصلے کو برقرار رکھا۔ لیکن جسٹس سودانشو دھولیا نے حجاب پہننے سے متعلق کرناٹک حکومت کے حکم کو کلعدم قرار دیا۔ اتفاق رائے نہ ہونے کی وجہ سے اب یہ معاملہ سپریم کورٹ کے چیف جسٹس جسٹس یو یو للت کے پاس بھیج دیا گیا ہے۔ اس طرح چیف جسٹس کو اس کیس کی سماعت کے لیے مزید ججوں پر مشتمل بینچ تشکیل دینا پڑے گا۔